Går frå Zynk til Arbeidarpartiet: – Draumejobb!
– Kunne ikkje anna enn å takka ja.
Publisert
– Då moglegheita opna seg for å koma tilbake til Arbeidarpartiet for å synleggjera politikken vår i Oslo, kunne eg difor ikkje anna enn å takka ja. Dette er ein draumejobb for meg, seier Karen Mjør til KOM24.
Ho har gått frå ei rådgjevar-rolle i Zynk og tilbake til politikken, for å vera presseansvarleg for bystyregruppa til Arbeidarpartiet i Oslo.
Ho har erfaring frå politikken frå tidlegare av, då ho har vore valkampmedarbeidar i Stortingsgruppa i samband med valkampen i 2021 og ho har vore kommunikasjonsrådgjevar for byråd for utdanning i Oslo før.
– Eg skal jobba saman med Marthe Scharning Lund og resten av heiltidspolitikarane på Rådhuset, for å synleggjera politikken vår og jobba for at me kan flytta tilbake til byrådskontora etter lokalvalet i 2027. Det inneber kontakt med media, innsal av saker og sikra god kommunikasjon av våre bodskap, fortel ho.
Hovudfokuset hennar vert på Oslo og arbeidet til bystyregruppa.
– Men eg skal òg jobba tett inn mot stortingsvalkampen for å synleggjera stortingskandidatane frå Oslo, seier ho.
Mjør var rådgjevar i Zynk i litt over eit år og seier ho er takksam for den fine og lærerike tida i Zynk.
– Å stå i konsulentrolla, med høgt tempo, varierte oppgåver og raske omstillingar, er ei verdifull erfaring som eg tar med meg vidare, seier ho.
Men no går ho altså frå å vera PR-rådgjevar som jobbar for kundar som vil ha gjennomslag, til å sitja på andre sida av borde. Mjør meiner det er ein fordel å ha erfaring frå begge sider.
– Det har vore nyttig å sjå korleis politikk treff både små og store verksemder, og eg trur den innsikta kjem godt med i min nye jobb.
Har du tips til denne eller andre saker? Kontakt oss på: tips@kom24.no
