Sylvi Listhaug og Audun Lysbakken er alltid i tottene på hverandre før et valg. Det mest overraskende i år er at det nå skjer i papiravisenes annonsesider.Tor Erik Schrøder/Stian Lysberg Solum/ NTB
Men politisk annonsering på papir var ikkje daudt - no kranglar Frp og SV så bustene fyker på papir
– Målet med annonsane på onsdag, var å rette opp misvisande påstandar frå Frp.
Det seier valkampsjef for Sosialistisk Venstreparti (SV), Kristian Fjellanger, til KOM24.
Førre laurdag hadde Framstegspartiet (Frp) inne annonse i VG der dei kom med fleire påstandar mot SV og deira skattepolitikk. Det fekk SV til å plukke opp hansken og svara på papir og digitalt. Onsdag svarte dei over eit dobbeltside i både Aftenposten og VG.
– Løgnaktige påstandar
– Me annonserer i papiraviser i svært liten grad. Grunnen til at me valde å annonsera i fleire aviser i går, var at Frp annonserte i dei same avisene på laurdag, der dei valde å spre misvisande og løgnaktige påstandar om SV sin politikk. Dette måtte me svara på, seier Fjellanger.
Fjellanger seier at dei i all hovudsak annonserer i sosiale medier, men også nokre annonser i aviser på nett.
Han seier at det var den rette staden å ta til motmæle i Aftenposten og VG, sidan det var der Frp fyrst kom med sine påstandar.
Dette er SVs svar-annonse.Skjermdump Aftenposten
– VG og Aftenposten er jo dei to største avisene i Noreg, så me når jo bredt med å annonsere i desse avisene, og det er jo sjølvsagt dei same annonsane i den digitale avisa, seier han.
Fjellanger seier at den beste effekten får dei om dei klarar å kombinera fleire kanalar samstundes.
Har auka annonsebudsjettet
– Sosiale medier er viktig, men det å møte ein SV-aktivist for ein prat, er jo gjerne den beste måten å overtyde ein veljar om at SV er det rette partiet for deg.
Før årets valkamp har SV rekruttert fleire tilsette på innhaldsproduksjon og sosiale medier.
– For å sikra at me har nok og bra innhald til sosiale medier, samt auka budsjetta til annonsering. Det er nok den største skilnaden frå tidlegare år, fortel han.
I Frp-leiren humrar dei over at SV heiv seg rundt og svarte dei.
– Det var interessant å sjå at dei brukte annonseplass på den måten. Det betyr vel at me har rørt ved noko som har noko for seg, seier marknadssjef i Framstegspartiet, Helge Fossum
– Vanskeleg å måla effekten
Han seier at sånn meiningsmålingane er no vil «sosialistane i SV og Mdg» få innflytelse.
– Då er det greitt at veljarane ser alternativa, seier han.
Han seier at ved å annonsera i avis vil dei nå ut til mange med bodskapen sin. Men kva effekten er, innrømmer han at er vanskeleg å seia noko om.
– Det er alltid vanskeleg å måla effektane, det er 13. september som vil visa effekten av det me har gjort, seier han.
Fossum seier Frp har omtrent dei samme ressursane tilgjengeleg i årets valkamp som i førre valkamp.
– Me har dei ressursane me har og me må bruka dei ressursane me har smartast mogleg, seier han.
